අමෙරිකාවෙන් ඊශ්‍රායලයට මූල්‍යාධාර
අමෙරිකානු කොංග්‍රස් මණ්ඩලය මඟින් ඊශ්‍රායලයට ඩොලර් බිලියන 14.3ක මූල්‍යාධාරයක් අනුමත කර තිබෙනවා.
එහෙත් එය සෙනෙට් මණ්ඩලයේ අනුමැතියට යොමු කළ යුතු අතර, සෙනෙට් මණ්ඩලයේ බහුතර බලය 51ට 49ක් ලෙස හිමි ව ඇත්තේ, ඩිමොක්‍රටික් පක්ෂයටයි.
කෙසේ හෝ කොංග්‍රස් මණ්ඩලය සහ සෙනෙට් මණ්ඩලය අනුමත කළත් ඊශ්‍රායල ආධාර යෝජනාව බලාත්මක වන්නේ, එය ජනපති ජෝ බයිඩන් විසින් අත්සන් තැබූ පසු පමණයි.
එහෙත්, ඊශ්‍රායලයට පමණක් මෙවර මූල්‍යාධාර ලබාදීම ජනපති බයිඩන්ගේ අපේක්ෂාව නොවන අතර, ඔහු එය ඊශ්‍රායලයට සහ යුක්‍රේනයට ඩොලර් බිලියන 106ක ඒකාබද්ධ ආධාර යෝජනාවක් ලෙස සම්මත කර ගැනීමට අපේක්ෂා කරන බව සඳහන් වනවා.
ඊශ්‍රායල – හමාස් සටන වෙනත් කවර කරුණකටත් වඩා අමෙරිකාවේ දේශපාලනයට බලපෑමක් එල්ල කරන්නේ, ප්‍රාණ ඇපකාර සිද්ධිය හේතුවෙන්.
හමාස් සංවිධානය විසින් ගාසා තීරයට ප්‍රාණ ඇපකරුවන් ලෙස පැහැරගෙන ගිය 200කට අධික පිරිස අතර අමෙරිකානුවන් 13 දෙනෙකුද සිටින බව වාර්තා වනවා.
අමෙරිකානු හමුදා ඊශ්‍රායලයේ ගාසා මෙහෙයුම් හා සම්බන්ධ නොවූවත් අමෙරිකාව ගාසා තීරයේ ඔත්තු බැලීම සඳහා ඩ්‍රෝන යානා යොදවා ඇති බව වාර්තා වනවා.
විශේෂයෙන් හමාස් සංවිධානය විසින් ප්‍රාණ ඇපකරුවන් සඟවා ගෙන සිටින ප්‍රදේශ පිළිබඳ සොයා බැලීම එහි අරමුණ වී තිබුණා.
හමාස් සන්නද්ධ කණ්ඩායම ඊශ්‍රායලයේ සිට ගාසා තීරයට ප්‍රාණ ඇපකරුවන් ලෙස රැගෙන ගිය පිරිස අතර තායිලන්ත ජාතිකයන් 23 දෙනෙක්ද ඒ අතර වනවා.
ඔවුන් නිරුපද්‍රිතව මුදාගැනීම සඳහා තායිලන්තය රාජ්‍යතාන්ත්‍රික පියවර ගෙන ඇති අතර, තායි විදේශ අමාත්‍යවරයා මැදපෙරදිග සංචාරයකද නිරත වුණා.
ඔහු එහිදී ඉරාන රජයේ නායකයන්ද හමුවූ අතර, ඔවුන් පවසා ඇත්තේ තායි ප්‍රාණ ඇපකරුවන් මුදාගැනීම සඳහා සහාය වීමට සූදානම් බවයි.
ඉරානය මෙන්ම කටාර් රාජ්‍යය සහ ඊජිප්තුවද තායි ප්‍රාණ ඇපකරුවන් මුදාහරින ලෙස හමාස් සංවිධානයෙන් ඉල්ලා සිටීමට පොරොන්දු වී තිබුණා.