මිලියන ගණනක් නැරඹූ සූර්ය ග්රහණය
ඇමෙරිකාවේ ජනපද 15 කට, අසල්වැසි මෙක්සිකෝවට සහ කැනඩාවට ඊයේ (08) පූර්ණ සූර්ය ග්රහණය දකින්න ලැබුණු බවත් ඇමෙරිකන් මහද්වීපයේ මිලියන ගණනක් එය නැරැඹූ බවත් විදෙස් මාධ්ය වාර්තා කරනවා.
ඇමෙරිකාවේ නාසා ආයතනය, ඔවුන්ගේ වෙබ් අඩවි ඔස්සේ සූර්ය ග්රහණය සිදුවන අයුරු සජීවීව විකාශය කළා.
යුරෝපා රටවල් කීපයකටද මෙම සූර්ය ග්රහණය දිස්වූයේ අර්ධ සූර්ය ග්රහණයක් ලෙසයි.
මිනිත්තු කීපයක් දහවල රැය බවට පරිවර්තනය වෙමින් මෙක්සිකෝවේ මැසල්ටන් වෙරළාශ්රිත නගරයට ඉතා පැහැදිලිව සූර්ය ග්රහණය දිස්වී තිබුණා.
විදෙස් මාධ්ය වාර්තා කළේ, මෙක්සිකෝ ජනාධිපති අන්ද්රේස් ලෝපේස් ද සුර්ය ග්රහණය නැරැඹීමට එක්වුණු බවයි.
එහිදී ඇමෙරිකාවේ ටෙක්සාස් ජනපදයේ ඊගල් පාස් සහ නිව්යෝක් වැසියන්ට සූර්ය ග්රහණය පැහැදිලිව දකින්න ලැබී තිබුණු බවද සඳහන්.
සූර්ය ග්රහණයක් ඇතිවන්නේ, සූර්යයාගේ කොටසක් හෝ සූර්යයා සම්පූර්ණයෙන්ම හෝ වැසී යන පරිද්දෙන් සූර්යයා සහ පෘථිවිය අතරින් සඳ ගමන් කරද්දීයි.
එමෙන්ම නාසා ආයතනය පෙන්වාදෙන්නේ පූර්ණ සූර්ය ග්රහණයක් දකින්න ලැබෙන්නේ ඉතාමත් කලාතුරකින් බවයි.
ඇමෙරිකානුවන්ට මින් පසු මෙවැනි පූර්ණ සූර්ය ග්රහණයක් දකින්න ලැබෙනු ඇත්තේ 2044 දී යැයි නාසා ආයතනය වැඩිදුරටත් සඳහන් කළා.