විදෙස්
පාකිස්තානයේ ජනපති ධූරය සර්දාරිට
පාකිස්තානයේ හවුල් රජයක් පිහිටුවීමෙන් පසු හිටපු ජනාධිපති අසීෆ් අල් සර්දාරි දෙවැනි වරටත් ජනපති ධුරයට පත් කර ඇති බව විදෙස් මාධ්‍ය වාර්තා කරනවා.
68 හැවිරිදි ජනාධිපතිවරයා එරට හිටපු අගමැතිනිය බෙනාසිර් භුතෝගේ සැමියා වන අතර, හිටපු විදේශ ඇමැති සහ පාකිස්තාන මහජන පක්ෂයේ නායක බිල්වාල් භූතෝගේ පියාද වනවා.
විදෙස් මාධ්‍ය වාර්තා කළේ, නව ජනාධිපති තෝරා පත් කරගැනීමට පසුගියදා පාර්ලිමේන්තුවේ සහ ප්‍රාන්ත රාජ්‍යයන්හි පැවැති ඡන්ද විමසීමේදී සර්දාරිට ඡන්ද 411ක් ලැබී ඇති අතර, ඔහුගේ ප්‍රතිවාදියාවූ ඉම්රාන් හිතවාදී මෙහ්මූඩ් ඛාන්ට ඡන්ද 181ක් ලැබී ඇති බවයි.
නව ජනාධිපතිවරයාගේ පළමු ධුර කාලය 2008 සිට 2013 දක්වා පැවැති අතර, පාකිස්තානයට නිදහස ලැබීමෙන් පසු උපන් පුද්ගලයකු එරට ජනාධිපති ධුරයට පත්වූ පළමු අවස්ථාවද එය බව විදෙස් මාධ්‍ය වැඩිදුරටත් වාර්තා කළා.