මගේ හිතේ ඉන්න කෙනා දැන්ම කියන්නේ නෑ – මහින්ද
ඉදිරි ජනාධිපතිවරණයට ජය ගත හැකි අපේක්ෂකයෙක් පොදු ජන පෙරමුණෙන් ඉදිරිපත් කරන බව හිටපු ජනාධිපති මහින්ද රාජපක්ෂ මහතා පවසනවා.
ඔහු මේ බව පැවසුවේ අද (23) පොදු ජන පෙරමුණේ පැවැති සාකච්ඡාවකට එක්වෙමින් අනතුරුව මාධ්‍ය වෙත අදහස් පල කරමින්.
සිය පක්ෂයෙන් ඉදිරිපත් වන්නට අපේක්ෂකයින්ගෙන් නම් කිහිපයක් යෝජනා වී ඇතත් තවමත් අවසන් තීරණයක් ගෙන නොමැති බව හිටපු ජනාධිපතිවරයා කියා සිටියා.
කෙසේ වෙතත් පොදු ජන පෙරමුණ දිනන තැනක සිටින බවත් තමන්ගේ හිතේ තියෙන අපේක්ෂකයා දැන්ම පැවසීමට නොහැකි බවත් ඔහු එහිදී අවධාරණය කලා.
එමෙන්ම සිය පුත්‍රයා වන නාමල් රාජපක්ෂ මන්ත්‍රීවරයාගේ අපේක්ෂකත්වය සම්බන්ධයෙන් විමසූ විට ඔහු පවසා සිටියේ ඒ සම්බන්ධයෙන් විමසිය යුත්තේ නාමල් රාජපක්ෂගෙන්ම වන බවයි. එමෙන්ම නාමල් රාජපක්ෂට ජනාධිපතිවරණයකට ඉදිරිපත් වීමට තවත් කල් ඇති බවත් ඔහු පවසා සිටියා.
මේ අතරතුර, මාධ්‍යය සමඟ අදහස් දක්වමින් පා.ම. නාමල් රාජපක්ෂ මහතා පවසා සිටියේ සිය පක්ෂය තුල මත කිහිපයක් තිබුනත් පාක්ෂිකයා සහ රටේ අනාගතය වෙනුවෙන් සුදුසු තීරණයක් ගනු ඇති බවයි.