මං නැත්නම් ජනපතිවරණයකුත් නෑ – විජයදාස
තමා කැබිනට් මණ්ඩලයේ සිටියේ නැතිනම් 2024 ජනාධිපතිවරණ මැතිවරණයක් නොපැවත්වෙන බවත් ඒ පිළිබඳව සියලු කාරණා ඉදිරියේදී හෙළිදරව් කරන බවත් ජාතික ප්‍රජාතන්ත්‍රවාදී පෙරමුණේ ජනාධිපතිධූර අපේක්ෂක විජයදාස රාජපක්ෂ මහතා පවසනවා.
ඔහු ඒ බව කියා සිටියේ, විජයග්‍රහණයේ පෙර දැක්ම නමින් ශ්‍රී ලංකා පදනම් ආයතනයේදී විශේෂිත නියෝජිත සමුළුවට සහභාගි වෙමින්.
විජයදාස රාජපක්ෂ ජනාධිපතිවරණ මෙහෙයුම් කාර්යාලය මෙම වැඩසටහන සංවිධානය කර තිබුණා.
එහිදී විජයදාස රාජපක්ෂ මහතා සඳහන් කළේ, කිසිවෙකු ශ්‍රී ලංකා නිදහස් පක්ෂ පාක්‍ෂිකයාගේ සහය නැතුව ජනාධිපති වීමට සිතනවා නම් එය කළ නොහැක්කක් බවයි.
නමුත් ඡන්ද තිබෙන්නේ පක්ෂ මූලස්ථානයේ නොව මහපොළොවේ බවද විජයදාස රාජපක්ෂ මහතා පවසනවා.
මෙය ඉතාම සුවිශේෂී මැතිවරණයක් බවත් රටේ පැවැත්ම හෝ වැනසීම තීරණය වන්නේ ද මෙම මැතිවරණයෙන් බවයි ඔහු පවසන්නේ.
තමා ජනාධිපති වන්නේ මිහිඳු හිමියන් දේවානම්පියතිස්ස රජතුමාට දුන් අවවාදය අනුව යමින් රටේ අයිතිකාරයා වීමට නොව භාරකාරයා වීමට බවද විජයදාස රාජපක්ෂ මහතා වැඩිදුරටත් සඳහන් කළා.