හොරෙන් ගෙනාපු වාහන රාජසන්තක කරන්න නියෝග
2018 වසරේ සිට 2024 වසර දක්වා රේගුවට හොර රහසේ ආනයනය කර රුපියල් කෝටි 25ක බදු ආදායමක් රටට අහිමි කළ රුපියල් කෝටි 40කට අධික වටිනාකමින් යුත් වාහන හතක් අත්අඩංගුවට ගෙන රාජසන්තක කරන ලෙස කොළඹ ප්‍රධාන මහේස්ත්‍රාත් තිළිණ ගමගේ මහතා අල්ලස් කොමිසමට අද (07) නියෝග කර තිබෙනවා.
අල්ලස් හෝ දූෂණ විමර්ශන කොමිසමේ රහසිගත හා බුද්ධි විමර්ශන ඒකකය ඉදිරිපත් කළ කරුණු සලකා බැලීමෙන් පසුව මෙම නියෝගය නිකුත් කළා.
මෙලෙස හොර රහසේ ආනයනය කළ වාහන රැසක් මීට පෙර අධිකරණ නියෝග මත අත්අඩංගුවට ගත් බව පෙන්වා දුන් ප්‍රධාන මහේස්ත්‍රාත්වරයා අත්අඩංගුවට ගෙන රාජසන්තක කිරීමෙන් නොනැවති අදාළ ජාවාරමට සම්බන්ධ සැකකරුවන් වහා අත්අඩංගුවට ගත යුතු බවට දන්වා සිටියා.
2018 වසරෙන් පසුව ආනයනය කරන වාහන සදහා ඉංග්‍රීසි අකුරු තුනක් සහිත ලියාපදිංචි අංකයක් හිමි විය යුතු වුවද , පරිගණක පද්ධතියේ දත්ත මකා තීරෝද රථ මෝටර් සයිකල් ඇතුළු අඩු වටිනාකමින් යුත් වාහන අංක සඳහා මෙම සුඛෝපභෝගී වාහන ලියාපදිංචි කර ඇති බවට අධිකරණයේදී කරුණු අනාවරණය වී තිබෙනවා.
බදුල්ල, වාරියපොළ, බලන්ගොඩ, වත්තල, ඇතුළු ප්‍රදේශයන්හි විවිධ පුද්ගලයින් හත් දෙනෙකුගේ නමට ලියාපදිංචි කර ඇති Gx 68 89. GH 5544, HA 2426, GY 4675, GS 9630, GZ8999,හා GU 9748 දරණ සුඛෝපභෝගී වාහන මෙලෙස අත්අඩංගුවට ගෙන වහා අධිකරණයට ඉදිරිපත් කර රේගුවට බාර දෙන ලෙසට නියෝග කළා.
මෙලෙස හොර රහසේ ආනයනය කර ලියාපදිංචි කළ වාහන 200කට අධික ප්‍රමාණයක් මේ වන විට අනාවරණය කරගෙන ඇති බවත් ,2015 වසරෙන් පසුව 2024වසර දක්වා තවත් විශාල ප්‍රමාණයක් මෙලෙස ගෙන්වා ඇති බවට තොරතුරු අනාවරණය වන බවත් කොමිසම කරුණු දක්වමින් පැවසුවා.