රනිල්ට එරෙහිව පැමිණිල්ලක්
ජනාධිපති මැතිවරණයක් ප්‍රකාශයට පත් කර ඇති මොහොතක ජනාධිපති රනිල් වික්‍රමසිංහ මහතා ශ්‍රේෂ්ඨාධිකරණ නියෝගයක් උල්ලංඝනය කරමින් නව සුරාබදු බලපත්‍ර 200කට අධික සංඛ්‍යාවක් දීමට එරෙහිව ශ්‍රී ලංකා මත්පැන් බලපත්‍රධාරි සංගමය මැතිවරණ කොමිෂන් සභාවට අද (12) පැමිණිලි කර තිබෙනවා.
ශ්‍රී ලංකා මත්පැන් බලපත්‍රධාරි සංගමයේ උප සභාපති ප්‍රසන්න විතානගේ මහතා පවසන්නේ මැතිවරණය ප්‍රකාශයට පත් කිරීමෙන් පසු නව බලපත්‍ර හයක් මේ වන විට නිකුත් කර ඇති බවත් ඉදිරි සතිය තුල තවත් බලපත්‍ර නිකුත් කිරීමට ආණ්ඩුව සුදානම් වී ඇති බවයි.
මැතිවරණ කොමිෂන් සභාවට කල පැමිණිල්ලෙන් පසු මාධ්‍යට අදහස් දක්වමින් ඔහු මේ බව සඳහන් කළා.
එහිදී වැඩිදුරටත් අදහස් දැක්වූ ප්‍රසන්න විතානගේ මහතා,
“වත්මන් ජනාධිපතිවරයා හා මුදල් අමාත්‍යවරයා මෙවර ජනාධිපතිවරණයේදී අපේක්ෂකයෙකු ලෙස ඇප මුදල් තැන්පත් කර ඇති අවස්ථාවක සුරාබදු දෙපාර්තමේන්තුවේ ප්‍රධානියා වන්නෙත් ඔහු. සුරාබදු දෙපාර්තමේන්තුව විසින් මේ වනවිට නව සුරාබදු බලපත්‍ර 200කට වැඩි ප්‍රමාණයක් දීමට කටයුතු කරගෙන යන බව අපිට තොරතුරු ලැබී තිබෙනවා. ඊට අමතරව ජනාධිපති මැතිවරණය ප්‍රකාශයට පත්කළාට පසු නව බලපත්‍ර 6ක් පමණ පෙර දිනයන් දමා නිකුත් කරලා තියෙනවා.”