සිනමාහල් වලට අලුත් නීතියක්
සිනමාශාලා තුළට ජංගම දුරකථන රැගෙනයාම සම්බන්ධයෙන් නව නීතියක් සැකසිය යුතු බව චිත්‍රපට අධ්‍යක්ෂකවරුන්ගේ සංගමය පවසනවා.
ඒ අනුව සිනමාශාලා තුළට ජංගම දුරකථන රැගෙනයාම වළක්වාලමින් නව නීතියක් නිර්මාණය කළ යුතු බවයි එම සංගමය පවසන්නේ.
ඒ සම්බන්ධයෙන් චිත්‍රපට සංස්ථාව මැදිහත් වී අවශ්‍යය නීතිමය ප්‍රතිපාදන සැකසිය යුතු බව එම සංගමය පෙන්වා දෙනවා.
එම සංගමය පවසන්නේ, පසුගිය කාල වකවානුවේදී සිදු වූ ඇතැම් සිද්ධීන් නිසා මෙම තීරණය ගැනීම යෝග්‍ය බවයි.
මේ අතර චිත්‍රපටි නැරඹීම සඳහා සිනමා ශාලාවකට යන අයට, මින් ඉදිරියට සිනමා ශාලාව තුළට ජංගම දුරකථන රැගෙන යාම තහනම් කළ යුතු බව ප්‍රවීණ චිත්‍රපට අධ්‍යක්ෂ ජයන්ත චන්ද්‍රසිරි මහතා පවසනවා.
ඒ අනුව ඒ සඳහා නීතියක් සම්පාදනය කළ යුතු බවයි මාධ්‍ය හමුවකට එක්වෙමින් ඔහු සඳහන් කළේ.
සිනමා අධ්‍යක්ෂක ආචාර්ය සෝමරත්න දිසානායකයන්ගේ සිංහබාහු චිත්‍රපටය පටිගත කර අන්තර්ජාලයට මුදා හැරීමේ සිද්ධිය සම්බන්ධයෙන් මාධ්‍ය වෙත අදහස් දක්වමින් ඔහු මේ බව සඳහන් කළා.