දුම්රිය වැඩවර්ජනය ගැන අවසන් තීරණය අද
සිය ඉල්ලීම් සම්බන්ධයෙන් ඉදිරියේ දී ගනු ලබන වෘත්තීය සමිති ක්‍රියාමාර්ග පිළිබඳ අද (16) දිනයේ දී අවසන් තීරණයකට පැමිණෙන බව දුම්රිය ස්ථානාධිපතිවරුන්ගේ සංගමය පවසනවා.
එම සංගමයේ සභාපති සුමේධ සෝමරත්න මහතා සඳහන් කළේ, සිය ඉල්ලීම්වලට විසඳුම් ලබාදීමට බලධාරීන් එකඟතාව පළකළ ද මෙතෙක් ඒ සම්බන්ධයෙන් නිසි විසඳුමක් ලැබී නොමැති බවයි.
උසස් වීම් ලබාදීම ඇතුළු ඉල්ලීම් කිහිපයක් මුල්කර ගනිමින් පසුගියදා දුම්රිය ස්ථානාධිපතිවරුන් වැඩවර්ජනයක නිරත වූ අතර අදාළ ගැටලුව කැබිනට් මණ්ඩලයට ඉදිරිපත් කර ඊට විසදුම් ලබාදෙන බවට විෂය භාර අමාත්‍යවරයා ලබාදුන් පොරොන්දුව මත එම වැඩවර්ජනය තාවකාලිකව නතර කරනු ලැබුවා.
කෙසේවෙතත් ඊයේ (15) දිනයේ දී සිය ඉල්ලීම් සම්බන්ධයෙන් කැබිනට් මණ්ඩලයේ අවධානය යොමුවී නොමැති බැවින් සිය ඉදිරි ක්‍රියාමාර්ග පිළිබඳ අද පෙරවරුවේ රැස් වී තීරණය කරන බව දුම්රිය ස්ථානාධිපතිවරුන්ගේ සංගමයේ සභාපති සුමේධ සෝමරත්න මහතා සඳහන් කළා.
මේ අතර ගුරු- විදුහල්පතිවරුන්ගේ ඉල්ලීම්වලට විසඳුම් ලබාදීමට බලධාරීන් මෙතෙක් පියවර නොගැනීම හේතුවෙන් ඉදිරියේ දී යළි වෘත්තීය සමිති ක්‍රියාමාර්ගවල නිරත වන බව ලංකා ගුරු සංගමය පවසනවා.
එහි සභාපති ප්‍රියන්ත ප්‍රනාන්දු මහතා සඳහන් කළේ, ගුරු-විදුහල්පතිවරුන්ට වැඩවර්ජනයකට යාමට සිදුවුවහොත් එහි වගකීම රජය භාරගත යුතු බවයි.
එහිදී වැඩිදුරටත් අදහස් දැක්වූ ඒ මහතා,
“විවිධ තර්ජන දාලා වෘත්තීය ක්‍රියාමාර්ග කඩාකප්පල් කරන්න ජනාධිපති උත්සාහ කරනවා. අපි දැවැන්ත විරෝධතා, විශාල උද්ඝෝෂණ ඇතුළු ක්‍රියාමාර්ග රැසක් අනිවාර්යයෙන්ම පාසල් පද්ධතිය තුළ මෙය ක්‍රියාවට නංවනවා. වැඩවර්ජන දක්වා මේ තත්ත්වය දරුණු වෙන්න ඉඩ දෙන්න එපා කියලා අපි කියනවා…”