ඇමෙරිකා ගුවනින් ගාසා තීරයට ආහාර මලු
අමෙරිකාව ගාසා තීරය සඳහා සිය පළමු මානුෂීය ආධාර ගුවනින් පතිත කර ඇති බව විදෙස් මාධ්‍ය වාර්තා කරනවා.
විදෙස් මාධ්‍ය වාර්තා කළේ, හමුදා ගුවන් යානා තුනකින් ආහාර මලු 30,000 කට වඩා පැරෂුට් ආකාරයට ගාසා තීරයට යොමු කර ඇති බවයි.
ඔවුන් එම තීරණය ගෙන ඇත්තේ පසුගිය බ්‍රහස්පතින්දා ආහාර රැගත් ලොරි පෙළක් අසලට රැස්වූ පලස්තීන වැසියන් 112 දෙනෙකු මියයෑමෙන් පසුව බවයි වාර්තාවන්නේ.
ගාසා තීරයේ සති හයක සටන් විරාමයක් සඳහාවූ ගිවිසුමක රාමුව ක්‍රියාත්මක වෙමින් පවතින බව එක්සත් ජනපදයේ ඉහළම නිලධාරියෙකු ප්‍රකාශ කිරීමත් සමඟ මෙම ගුවන් යානය පැමිණ තිබෙනවා.
බයිඩ්න් පරිපාලන නිලධාරියා ඉකුත් සෙනසුරාදා කියා සිටියේ, ඊශ්‍රායලය නව සටන් විරාමයක් පිළිබඳ ගිවිසුමක් “වැඩි වශයෙන් හෝ අඩු වශයෙන් පිළිගෙන ඇති” බවයි.
පසුගිය සෙනසුරාදා C-130 ප්‍රවාහන ගුවන් යානා ගාසා භූමියේ වෙරළ තීරය ඔස්සේ ආහාර මලු 38,000 කට වැඩි ප්‍රමාණයක් අතහැර දැමූ බව එක්සත් ජනපද මධ්‍යම විධානය නිවේදනයක් නිකුත් කරමින් කියා සිටියා.
එක්සත් රාජධානිය, ප්‍රංශය, ඊජිප්තුව සහ ජෝර්දානය ඇතුළු අනෙකුත් රටවල් මීට පෙර ගාසා තීරයට ගුවනින් ආධාර හෙළා ඇති නමුත් මෙය අමෙරිකාව විසින් කරන ලද පළමු අවස්ථාව බව සඳහන්.