ලොව ප්‍රථම කෘත්‍රිම බුද්ධි ළමයා චීනයෙන්
විද්‍යා ප්‍රබන්ධ කතා යථාර්තයක් කරමින් ලොව ප්‍රථම කෘතිම බුද්ධියෙන් බලගැන්වුණු ළමයා චීන විද්‍යාඥයන් විසින් පසුගිය 28 – 29 ලොවට හඳුන්වා දෙනු ලැබුවා.
ඒ බෙයිජිං නුවර පැවැති කෘතිම බුද්ධි තාක්ෂණය පිළිබඳ ප්‍රදර්ශනයකදී.
මෙම කෘතිම බුද්ධියෙන් බලගැන්වුණු ළමයා ටොන්ග් ටොන්ග් ලෙස චීන විද්‍යාඥයන් විසින් නම් කර ඇති බව විදෙස් මාධ්‍ය වාර්තා කළා.
ටොන්ග් ටොන්ග් යන නමෙහි ඉංග්‍රීසි අර්ථය ලිට්ල් ගර්ල් ලෙස හැදින්වෙනවා.
ටොන්ග් ටොන්ග් යනු සැබෑ ලෝකය තුළ ජීවත් වන දැරියක් නොවන අතර ඇය ජීවත් වන්නේ අතත්‍ය එසේත් නැතිනම් පරිගණක ලෝකය තුළයි.
පරිගණක ලෝකය තුළ ජීවත් වුනත් සැබෑ ළමයකු කරන බොහෝ දේ කිරීමට ටොන්ග් ටොන්ග්ට හැකියාව තිබෙනවා.
ටොන්ග් ටොන්ග් නිර්මාණය කිරීමට චීන විද්‍යාඥයන්ට වසර කිහිපයක් ගතවී ඇති අතර එම ව්‍යාපෘතියේ මූලික ඉලක්කයවී තිබී ඇත්තේ හැඟීම් බරව මිනිසුන් සමඟ අන්තර් ක්‍රියා කළ හැකි, ඉගෙන ගැනීමට මෙන්ම අවස්ථාවට අනුකූලව අනුගත වීමේ හැකියාව ඇති කෘතිම බුද්ධියක් නිර්මාණය කිරීමයි.
ටොන්ග් ටොන්ග්ට මිනිස් හැඟීම් හඳුනාගත හැකි අතර එම හැඟීම්වලට ගැලපෙන පරිද්දෙන් ප්‍රතිචාර දැක්වීමටද ඇයට හැකියාව තිබෙනවා.
ටොන්ග් ටොන්ග්ට ඇති එම හැකියාව හේතුවෙන් ඇය සමඟ අදහස් හුවමාරු කරගන්නා පුද්ගලයකුට ටොන්ග් ටොන්ග් පරිගණක ලෝකයේ ජීවත්වන දැරියක් බව නොසිතෙන බවද එරට මාධ්‍ය සඳහන් කළා.
එමෙන්ම ටොන්ග් ටොන්ග්ට මිනිස් දැරියක මෙන්ම ඉගෙන ගැනීමේ හැකියාව ඇති අතර ඇයට භාෂා තේරුම් ගැනීමට මෙන්ම ගැටලු විසඳීමේ හැකියාව වර්ධනය කර ගැනීමටද හැකියාව තිබෙනවා.
එපමණක් නොව ටොන්ග් ටොන්ග්ට සැබෑ මිනිස් දැරියක මෙන්ම ස්වභාවික සංවාදයක නියැලීමේ හැකියාවද තිබෙනවා.